ایشون کی ہرسال عالمی کپ ہونے پر سخت تنقید

نئی دہلی: ہرسال کسی نہ کسی صورت میں آئی سی سی ورلڈکپ منعقد ہونے پر بھارت کے سابق کرکٹ روی چندرن ایشون نے سخت تنقید کرتے ہوئے کہاہے کہ ورلڈکپ چار سال بعد ہوتا توکارڈ جیب میں رکھتے تھے۔

یوٹیوب ویڈیو میں ٹی ٹوئنٹی ورلڈکپ کے مسلسل انعقاد کو تنقید کا نشانہ بناتے ہوئے سابق آف اسپنر ایشون نے کہا کہ آئی سی سی ٹی ٹوئنٹی ورلڈکپ اس وقت کون دیکھنے والا ہے، بھارت بمقابلہ امریکا یا بھارت بمقابلہ نمیبیا جیسے میچز سے کون لطف اندوز ہوگا۔

انھوں نے شائقین کی عدم دلچسپی کا اظہار کرتے ہوئے کہا کہ یہ اس طرح کے میچز ہیں کو آپ کو ورلڈکپ سے دور لے جائیں گے اور میچز دیکھنے کی خواہش ختم کردیں گے۔

روی چندرن ایشون نے ماضی کا حوالہ دیتے ہوئے کہا کہ 1996، 1999، 2003 تب میں اسکول میں پڑھ رہا تھا، ورلڈکپ آنے کا وقت ہوتا تو ہم لوگوں کے پاس پورے میچز کا شیڈول کارڈ کی صورت میں ہوا کرتا تھا۔

انھوں نے کہا کہ ورلڈکپ کا شیڈول پرنٹ کروا کر کارڈ کی صورت میں لوگ اسے اپنے پاس رکھتے تھے کیوں کہ ورلڈکپ چار سال میں ایک بار ہوا کرتا تھا، اس وجہ سے لوگوں میں اویونٹ کیلئے دلچسپی بہت بڑھ جاتی تھی۔

ایشون کا کہنا تھا کہ گروپ مقابلوں میں بھی بھارت انگلینڈ، سری لنکا اور دوسری بڑی ٹیموں سے مقابلہ کرتی تھی، اب پہلے جیسی بات نہیں رہی اور ٹیموں کا ایک دوسرے سے سبقت لے جانے والا جذبہ یہاں مسنگ ہے۔