کرسٹیانو رونالڈو کے بیان سے مداح افسردہ ہوگئے

لزبن: بین الاقوامی شہرت یافتہ پرتگالی فٹبالر کرسٹیانو رونالڈو نے عندیہ دیا ہے کہ وہ جلد ہی فٹبال سے ریٹائرمنٹ اختیار کر سکتے ہیں۔

میڈیا رپورٹ کے مطابق کرسٹیانو رونالڈو اس وقت سعودی کلب النصر کی نمائندگی کر رہے ہیں،رونالڈو اب تک کلب اور ملک کی سطح پر مجموعی طور پر 952 گولز اسکور کر چکے ہیں اور گزشتہ ماہ انہوں نے کہا تھا کہ اِن کا ہدف 1000 گول مکمل کرنے کے بعد کھیل کو خیرباد کہنا ہے۔

معروف برطانوی میزبان پیئرز مورگن کو دئیے گئے خصوصی انٹرویو میں 40 سالہ فٹبالر نے کہا کہ وہ اپنے خاندان کے ساتھ زیادہ وقت گزارنے اور زندگی کے اگلے مرحلے کی تیاری کے لیے کھیل سے رخصت لینے کا سوچ رہے ہیں۔

انٹرویو کے دوران جَلد ریٹائرمنٹ کے سوال پر جواب دیتے ہوئے کرسٹیانو رونالڈو نے کہا کہ یہ بہت مشکل ہوگا کیونکہ فٹبال سے ملنے والی خوشی جیسی کوئی چیز نہیں تاہم ہر چیز کا ایک آغاز ہوتا ہے اور ایک اختتام بھی، میں اپنے لیے، اپنے خاندان کے لیے اور بچوں کی پرورش کے لیے زیادہ وقت چاہتا ہوں۔

کرسٹیانو رونالڈو نے انکشاف کیا کہ وہ 25 یا 26 سال کی عمر سے ہی فٹبال کے بعد کی زندگی کی منصوبہ بندی کر رہے ہیں، اِن کے مطابق وہ اس دباؤ کو سنبھالنے کے لیے ذہنی طور پر تیار ہیں۔

اِنہوںنے کہاکہ زندگی میں بہت سی چیزیں ہیں جن کا تجربہ کرنا ابھی باقی ہے تاہم فٹبال جیسی خوشی کہیں نہیں، پھر بھی، مجھے معلوم ہے کہ صحیح وقت پر رخصت ہونا ضروری ہے۔

رونالڈو کے مطابق میں اپنے بچوں کی پرورش اور ذاتی زندگی پر توجہ دینا چاہتا ہوں، میں نے ساری زندگی سفر اور فٹبال میں گزاری ہے، اب وقت ہے کہ میں اپنے بچوں کے ساتھ رہوں اور اپنی فیملی کو وقت دوں۔