سندھ کے ضلع خیرپور میں گیس اور کنڈینسیٹ کے نئے ذخائر دریافت

آئل اینڈ گیس ڈویلپمنٹ کمپنی او جی ڈی سی نے صوبہ سندھ کے ضلع خیرپور میں گیس و کنڈینسیٹ کی نئی دریافت کا اعلان کر دیا ہے۔

تفصیلات کے مطابق گیس اور کنڈینسیٹ کے نئے ذخائر کی دریافت ضلع خیرپور بترسم ایسٹ 1 ایکسپلورٹری کنویں سے ہوئی۔

او جی ڈی سی کا کہنا ہے کہ کنویں سے یومیہ 22.5 ایم ایم ایس سی ایف ڈی گیس اور نئی دریافت سے یومیہ 690  بیرل کنڈینسیٹ پیداوار حاصل ہوگی۔

رپورٹس کے مطابق کنویں کی کھدائی 30 جون 2025 کو شروع کی گئی تھی، کنویں کی گہرائی 3 ہزار 800 میٹر تک کی گئی۔

کمپنی نے پی ایس ایکس کو خط میں بتایا کہ دو ڈرل اسٹیم ٹیسٹ بھی کامیابی سے مکمل کیے گئے۔ نئی دریافت توانائی سپلائی و ڈیمانڈ کے فرق کو کم کرنے میں مددگار ہوگی جبکہ ملک کے ہائیڈرو کاربن ریزروز میں اضافہ ہوگا۔