پی آئی اے کی لندن کے لیے روزانہ پروازیں، برمنگھم آپریشن یکم دسمبر سے بحال

اسلام آباد:  قومی ایئرلائن پاکستان انٹرنیشنل ایئرلائنز (پی آئی اے) کی بین الاقوامی فضاوں میں واپسی کا سفر ایک اہم مرحلے میں داخل ہوگیا ہے۔ لندن کے لیے ہفتہ وار پروازوں کی تعداد بڑھا کر 7 کردی گئی ہے، جبکہ برمنگھم کے لیے براہ راست فضائی آپریشن یکم دسمبر 2026 سے بحال کیا جا رہا ہے۔

 اس پیش رفت کو قومی ایئرلائن کے بین الاقوامی نیٹ ورک کی بحالی اور برطانیہ میں مقیم پاکستانیوں کے لیے سفری سہولتوں میں اضافے کی جانب اہم قدم قرار دیا جا رہا ہے۔

نئے شیڈول کے مطابق اسلام آباد سے لندن کے لیے ہفتے میں 5 جبکہ لاہور سے 2 پروازیں روانہ ہوں گی۔ اس طرح پاکستان اور برطانیہ کے درمیان پی آئی اے کا فضائی رابطہ روزانہ کی بنیاد پر دستیاب ہوگا، جس سے مسافروں کو سفر کی منصوبہ بندی میں مزید سہولت میسر آئے گی۔

پی آئی اے کے لیے ایک اور اہم پیش رفت بوئنگ 787 ڈریم لائنر طیاروں کو فضائی آپریشن میں شامل کرنے کا منصوبہ ہے۔ جدید طیاروں کی شمولیت قومی ایئرلائن کے آپریشنز میں بہتری اور بین الاقوامی روٹس پر مسافروں کو بہتر سفری سہولتیں فراہم کرنے کی کوششوں کا حصہ ہے۔

پی آئی اے کو بین الاقوامی فضائی آپریشن میں مشکلات کا سامنا اس وقت کرنا پڑا جب 22 مئی 2020 کو کراچی میں پرواز پی کے 8303 حادثے کا شکار ہوئی، جس میں 97 افراد جاں بحق ہوگئے تھے۔

 اس سانحے کے بعد پاکستان کے ہوا بازی کے نظام، حفاظتی انتظامات اور پائلٹس کے لائسنسوں سے متعلق سوالات اٹھے، جس کے نتیجے میں بین الاقوامی سطح پر پاکستانی ایئرلائنز کی نگرانی اور حفاظتی معیار پر تحفظات سامنے آئے۔

جون 2020 میں یورپی یونین ایوی ایشن سیفٹی ایجنسی نے پی آئی اے کی یورپ کے لیے پروازوں کی اجازت معطل کردی، جبکہ برطانوی حکام نے بھی پاکستانی ایئرلائنز پر پابندیاں عائد کیں۔

 ان پابندیوں کے باعث قومی ایئرلائن کو اہم بین الاقوامی منڈیوں تک رسائی میں طویل عرصے تک مشکلات کا سامنا رہا۔پاکستان میں ہوا بازی کے حفاظتی نظام، پائلٹ لائسنسنگ اور نگرانی کے طریقہ کار میں اصلاحات کے بعد بحالی کی راہ ہموار ہوئی۔

 نومبر 2024 میں یورپی یونین نے پی آئی اے پر عائد پابندی اٹھا لی، جبکہ جولائی 2025 میں برطانیہ نے پاکستان کو اپنی ایئر سیفٹی لسٹ سے خارج کردیا، جس کے بعد برطانوی روٹس پر فضائی آپریشن کی بحالی ممکن ہوئی۔

پی آئی اے نے مارچ 2026 میں لندن کے لیے براہ راست پروازیں بحال کیں۔ 29 مارچ کو اسلام آباد سے لندن ہیتھرو کے لیے پرواز روانہ ہوئی، جبکہ اگلے روز لاہور سے بھی براہ راست فضائی رابطہ قائم ہوگیا۔