کمشنر راولپنڈی کے الزامات کی تحقیقات مکمل

الیکشن کمیشن کی اعلی سطح کی کمیٹی نے سابق کمشنر راولپنڈی لیاقت علی چٹھہ کے دھاندلی کے الزامات پر تحقیقات مکمل کرلیں۔

ذرائع کے مطابق تحقیقاتی کمیٹی نے راولپنڈی ڈویژن کے تمام ڈی آر اوز اور آ راوز کے بیانات قلمبند کیے جس میں انہوں نے سابق کمشنر کے انتخابات میں دھاندلی کے الزامات کو یکسر مسترد کر دیا۔

راولپنڈی ڈویژن کے تمام 6 ڈی آر اوز کے تحریری بیانات ریکارڈ کیے جبکہ قومی اسمبلی کے 13 اور صوبائی کے 26 ریٹرننگ افسران کے بیانات بھی قلمبند کیے گئے ہیں۔

سابق کمشنر راولپنڈی کے دھاندلی سے متعلق الزامات کی پریس کانفرنس کے ٹرانسکرپٹ کو بھی تحقیقاتی رپورٹ کا حصہ بنایا گیا ہے۔

 الیکشن کمیشن کی اعلیٰ سطح تحقیقاتی کمیٹی آج آخری اجلاس کے بعد الیکشن کمیشن کو رپورٹ پیش کرے گی۔