بشری بی بی کی جان کو شدید خطرہ، اہل خانہ اور وکلا کو ملاقات سے روک دیا گیا، دعوی

سابق خاتون اول بشریٰ بی بی کی تیزی سے گرتی ہوئی صحت کو چھپانے کے لیے وکلا اور اہل خانہ کو ان تک رسائی سے روکا جا رہا ہے۔

 بشریٰ بی بی کی وکیل اور ترجمان مشال یوسفزئی نے 'ایکس' پر ایک پوسٹ میں انکشاف کیا کہ بنی گالہ سب جیل میں قید سابق خاتون اول کی قانونی ٹیم اور ان کے اہل خانہ کو ان سے ملنے کی اجازت نہیں دی گئی۔

انہوں نے لکھا کہ بشریٰ عمران خان کی صحت کے بارے میں قوم کے سامنے انکشاف کرنے کے بعد اب ہمیں ان سے ملنے سے انکار کیا جا رہا ہے۔ 

مشال کے مطابق آج طے شدہ ملاقات کے مطابق اہل خانہ اور وکلا نے بنی گالہ سب جیل میں بشریٰ بی بی سے ملاقات کرنی تھی۔ یہ میٹنگ نامعلوم وجوہات کی بنا پر ملتوی کر دی گئی ہے، اور ہمیں اس کے بارے میں کوئی اطلاع موصول نہیں ہو رہی ہے۔

انہوں نے خدشہ ظاہر کیا کہ ایسا لگتا ہے کہ یہ صورتحال ہمیں اس کی حالت سے بے خبر رکھنے کے لیے بنائی گئی ہے۔ انہوں نے مزید کہا کہ بشریٰ بی بی کی جان کو شدید خطرہ ہے۔