غزہ میں اسرائیلی فوجی کارروائیوں میں 18 ہزار 885 بچے شہید

غزہ کے سرکاری میڈیا آفس نے کہا ہے کہ غزہ میں تقریبا دو سال سے جاری اسرائیلی فوجی کارروائیوں میں 18 ہزار885 بچے شہید ہو چکے ہیں ،شہید ہونے والے فلسطینیوں کی مجموعی تعداد 62ہزار سے زیادہ ہو چکی ہے۔

عرب ٹی وی کی رپورٹ کے مطابق فلسطینی پناہ گزینوں کے لیے اقوام متحدہ کی ایجنسی(( یو این آر ڈبلیو اے ) نے کہا کہ غزہ میں بچوں کے لیے کوئی جگہ محفوظ نہیں ہے ، اور اسرائیل کی جانب سے اشد ضروری امداد اور طبی سامان کی ناکہ بندی کی وجہ سے یہاں کے مکین خصوصا بچے بھوک سے مر رہے ہیں۔

ادار ے نے کہا کہ اسرائیل کی مسلسل بمباری کے دوران غزہ میں اقوام متحدہ کے زیر انتظام سکول لاکھوں لوگوں کے لیے پناہ گاہوں کاکام کر رہے تھے تاہم اب یہ پناہ گاہیں بھی غزہ کے مکینوں کے لئے جن میں بہت سے بچے شامل ہیں،مقتل بن چکی ہیں۔


رپورٹ میں یونیسیف کے حوالے سے بتایا گیا ہے کہ اسرائیل کی طرف سے یک طرفہ طور پر جنگ بندی کے معاہدے کی خلاف ورزی کرنے اور حملے دوبارہ شروع کرنے کے بعد گزشتہ پانچ ماہ سے غزہ میں ہر ماہ اوسطا 540 سے زیادہ بچے شہید ہو گئے ہیں۔

 عالمی انتباہات کے باوجود اسرائیلی افواج غزہ شہر پر حملوں میں تیزی لا رہی ہیں جن میں بڑی تعداد میں امدادی مراکز پر جمع فلسطینی مارے جا رہے ہیں ۔