اسرائیلی پارلیمنٹ نے فلسطینی قیدیوں کو سزائے موت کا قانون منظور کرلیا

اسرائیل کی پارلیمنٹ نے ایک نیا قانون منظور کر لیا ہے جس کے تحت بعض فلسطینی قیدیوں کے لیے سزائے موت متعارف کرائی گئی ہے، جس پر بین الاقوامی سطح پر شدید ردعمل سامنے آیا ہے۔

غیر ملکی میڈیا رپورٹس کے مطابق اس قانون کے تحت مقبوضہ مغربی کنارے میں ایسے فلسطینی قیدیوں کو سزائے موت دی جا سکے گی جن پر جان لیوا حملوں میں ملوث ہونے کا الزام ہو۔ حکام کا کہنا ہے کہ اس اقدام کا مقصد سیکیورٹی کو مزید سخت بنانا ہے۔

قانون میں یہ بھی درج ہے کہ سزائے موت پانے والے افراد کو الگ حراستی مراکز میں رکھا جائے گا اور انہیں عام ملاقاتوں کی اجازت نہیں ہوگی۔ قانونی مشاورت ویڈیو لنک کے ذریعے کی جائے گی جبکہ سزا پر عمل درآمد ایک مخصوص مدت کے اندر مکمل کیا جائے گا۔

دوسری جانب یورپی ممالک اور انسانی حقوق کی تنظیموں نے اس قانون پر کڑی تنقید کی ہے اور اسے امتیازی قرار دیا ہے۔ ناقدین کا کہنا ہے کہ اس طرح کے اقدامات سے خطے میں کشیدگی مزید بڑھ سکتی ہے اور انسانی حقوق سے متعلق خدشات میں اضافہ ہو سکتا ہے۔