پاسپورٹ رینکنگ جاری، بدترین فہرست میں شامل ہونے کے باوجود پاکستانی کتنے ممالک بغیر ویزا جاسکتے ہیں

دنیا بھر کے پاسپورٹ کی رینکنگ جاری کردی گئی، ہینلے پاسپورٹ انڈیکس کی تازہ 2025 رپورٹ کے مطابق پاکستانی پاسپورٹ ایک بار پھر عالمی درجہ بندی میں نیچے آگیا ہے۔ نیا رینک 103 واں ہے، جو گزشتہ سال کے 96 ویں نمبر سے سات درجے کم ہے۔

تازہ فہرست کے مطابق پاکستانی شہری اس وقت دنیا کے صرف 31 ممالک میں بغیر ویزا داخل ہو سکتے ہیں، جب کہ گزشتہ انڈیکس میں یہ تعداد 32 ممالک تھی۔ اس طرح پاکستان کا پاسپورٹ دنیا کے کمزور ترین پاسپورٹس میں شمار ہوتا ہے۔

پاکستان سے نیچے صرف عراق (104 واں)، شام (105 واں) اور افغانستان (106 واں) ہیں، جبکہ یمن کے ساتھ پاکستان کا درجہ برابر ہے۔ دوسری جانب بھارت کا پاسپورٹ بھی اپنی پوزیشن کھو بیٹھا ہے اور اب وہ 85 ویں نمبر پر آ گیا ہے۔

دنیا کا سب سے طاقتور پاسپورٹ اس بار بھی سنگاپور کا قرار پایا ہے، جس کے شہری 193 ممالک میں ویزا فری یا ویزا آن ارائیول کی سہولت سے مستفید ہو سکتے ہیں۔

اس کے بعد جنوبی کوریا (190 ممالک) اور جاپان (189 ممالک) بالترتیب دوسرے اور تیسرے نمبر پر ہیں۔

جبکہ یورپی ممالک جرمنی، اٹلی، اسپین، لکسمبرگ اور سوئٹزرلینڈ مشترکہ طور پر چوتھے مقام پر ہیں، جن کے شہری 188 ممالک تک بلا روک ٹوک سفر کر سکتے ہیں۔

امریکی پاسپورٹ کی گراوٹ:

دلچسپ طور پر امریکی پاسپورٹ بھی اپنی تاریخ کی کم ترین پوزیشن پر پہنچ گیا ہے اور اب وہ 12 ویں نمبر پر ہے — جو ملائیشیا کے برابر ہے۔

امریکی شہریوں کو اس وقت 180 ممالک میں ویزا فری داخلے کی اجازت حاصل ہے، مگر امریکا خود صرف 46 ممالک کے شہریوں کو بغیر ویزا داخلہ دیتا ہے۔

رپورٹ کے مطابق، چین نے گزشتہ ایک دہائی میں غیر معمولی ترقی کی ہے۔ 2015 میں 94 ویں نمبر پر موجود چینی پاسپورٹ اب 64 ویں مقام پر پہنچ چکا ہے۔ صرف پچھلے ایک سال میں چین نے 30 نئے ممالک کے ساتھ ویزا فری یا ویزا آن ارائیول معاہدے کیے ہیں۔

ہینلے اینڈ پارٹنرز کے مطابق، چین کی ویزا پالیسی میں نرمی اور بین الاقوامی تعاون میں اضافے نے ایشیا پیسیفک خطے کو سفری آزادی کے لحاظ سے دنیا بھر میں نمایاں مقام دلا دیا ہے۔