ہم نے منظوری نہ دی تو ایران کا نیا سپریم لیڈر زیادہ دیر نہیں چلے گا، ٹرمپ

تہران: ایران کی جانب سے اگلے رہبر کے نام کے اعلان کے قریب پہنچنے پر امریکی صدر ڈونلڈ ٹرمپ نے اس بات پر زور دیا کہ اگر واشنگٹن نے منظوری نہ دی تو ایران کا نیا سپریم لیڈر زیادہ دیر نہیں چلے گا۔

ٹرمپ نے گفتگو میں کہا کہ اسے ہماری منظوری کی ضرورت ہوگی۔ اگر اسے یہ حاصل نہ ہوئی تو وہ زیادہ دیر نہیں چلے گا۔

انہوں نے مزید کہا کہ ہم اس بات کو یقینی بنانا چاہتے ہیں کہ ہمیں ہر 10 سال بعد واپس اسی صورتحال پر نہ آنا پڑے۔ خاص طور پر میرے جیسے صدر کی عدم موجودگی میں جو ایسا نہ کر سکے۔

دریں اثنا انہوں نے کہا کہ پرانے نظام کے کچھ لوگ علی خامنہ ای کی جانشینی کے اہل ہیں جو 28 فروری کو امریکی و اسرائیلی حملوں کے پہلے دن مارے گئے تھے۔

امریکی صدر نے ایران پر الزام لگایا کہ وہ مشرقِ وسطی پر قبضے کی منصوبہ بندی کر رہا تھا اور ہم نے اسے ایسا کرنے سے روک دیا۔ انہوں نے کہا کہ وہ محض ایک کاغذی شیر ہیں۔

یقین کریں، ایک ہفتہ پہلے وہ ایسے نہیں تھے۔ وہ حملے کے قریب تھے۔ ان کا منصوبہ پورے مشرقِ وسطی پر حملہ کرنے اور اس پر قبضہ کرنے کا تھا۔

ٹرمپ نے ایران کے افزودہ یورینیم پر قبضے کے لیے خصوصی دستے بھیجنے کے امکان کو مسترد نہیں کیا اور واضح کیا کہ سب کچھ میز پر ہے۔

ایران کے ساتھ جنگ کے خاتمے کے ٹائم ٹیبل کے بارے میں پوچھے جانے پر ٹرمپ نے جواب دیا کہ میں نہیں جانتا۔ میں کبھی پیش گوئی نہیں کرتا۔

 میں صرف اتنا کہہ سکتا ہوں کہ ہم وقت اور تاثیر دونوں لحاظ سے شیڈول سے آگے ہیں۔

یہ بیانات ایک ایسے وقت میں سامنے آئے ہیں جب ایران نے اتوار کو اس سے قبل اعلان کیا تھا کہ امریکی اور اسرائیلی حملوں کے تسلسل کے باوجود اس نے علی خامنہ ای کے جانشین کا انتخاب کر لیا ہے۔ علی خامنہ ای نے 1989 میں یہ عہدہ سنبھالا تھا۔