آج رات کعبۃ اللہ کا غلاف تبدیل کیا جائے گا، روح پرور تقریب کی تیاریاں مکمل

 دنیا بھر کے مسلمانوں کی توجہ آج رات مسجد الحرام کی جانب مرکوز رہے گی، جہاں اسلامی نئے ہجری سال کے آغاز پر کعبۃ اللہ کا سالانہ غلاف، جسے کسوہ بھی کہا جاتا ہے، تبدیل کیا جائے گا۔

حرمین شریفین انتظامیہ کے مطابق غلاف کی تبدیلی کا عمل عشاء کی نماز کے بعد شروع ہوگا۔ اس موقع پر خصوصی تربیت یافتہ ٹیم انتہائی احتیاط اور منظم انداز میں موجودہ غلاف کو اتار کر نیا غلاف کعبۃ اللہ پر چڑھائے گی۔ یہ مرحلہ کئی گھنٹوں پر محیط ہوگا اور رات گئے تک مکمل ہونے کی توقع ہے۔

نیا غلاف کنگ عبدالعزیز کمپلیکس فار کسوہ میں جدید اور روایتی مہارت کے امتزاج سے تیار کیا گیا ہے۔ غلاف کی تیاری میں ماہر کاریگروں نے کئی ماہ تک محنت کی، جبکہ اس پر سونے اور چاندی کے تاروں سے قرآنی آیات اور اسلامی نقوش کی خوبصورت کڑھائی کی گئی ہے۔