ورلڈ چمپئن لیگ 2025' جادوگر اسپنر سعید اجمل نے سب کو حیران کردیا

لیسٹر: ہتھیار چھوڑے ہیں، چلانا نہیں بھُولے۔ پاکستانی جادوگر اسپنر سعید اجمل نے ورلڈ چیمپئن شپ آف لیجنڈز میں آتے ہی دھوم مچادی۔

لیسٹر میں کھیلے جانے والے میچ میں پاکستانی آف اسپنر سعید اجمل کی خطرناک بولنگ کی بدولت پاکستان نے آسٹریلیا چیمپئنز کو 10 وکٹوں سے شکست دی۔

سعید اجمل نے اپنی نپی تُلی بالنگ سے آسٹریلیا چیمپئنز کے 6 بلے باز ٹھکانے لگا دیے، پوری ٹیم کو صرف 74رنز پرسمیٹ دیا، 9 بلے باز ڈبل فگر میں بھی نہ جاسکے۔

 بین ڈنک 26 رنز بنا کر نمایاں رہے۔کینگروز سعید اجمل کی گوگلی گیندوں کو سمجھنے میں مکمل ناکام رہے، دوسرا اور تیسرا کے مؤجد سعید اجمل نے اپنی گھومتی گیندوں پر صرف 16 رنز دے کر 6 کینگروز کا شکار کیا۔

لیسٹر میں قومی ٹیم نے پچھتر رنز کا ہدف ہنستے کھیلتے 8ویں اوورمیں حاصل کیا۔ کینگروز کو دس وکٹ سے ہرا کر پاکستان نے ناقابل شکست کا ریکارڈ برقرار رکھا۔

گرین شرٹس پہلے ہی سیمی فائنل میں پہنچ چکے ہیں۔ فائنل میں رسائی کے لیے روایتی حریف بھارت سے ٹکرائیں گے۔