سی ٹی ڈی ہیڈکوارٹرز کی عمارت سے سرویلنس ڈرون ٹکرا گیا

لاہور میں سی ٹی ڈی ہیڈکوارٹرز کی عمارت کی بیرونی دیوار سے جدید سرویلنس ڈرون ٹکرا کر گرگیا۔ پولیس کے مطابق واقعہ رات ساڑھے 12 بجے پیش آیا۔

 ڈرون جلو موڑ کی جانب سے آیا اور ہیڈکوارٹرز کی بیرونی دیوار سے ٹکرا کر نیچے گرگیا۔ سی ٹی ڈی کی سیکیورٹی ٹیم نے ڈرون قبضے میں لے لیا۔

 پولیس کے مطابق ڈرون کے ساتھ منسلک کیمرے اور بیٹری کی لائٹس آپریشنل تھیں جبکہ اس کی مدد سے ہیڈکوارٹرز کے اندرونی حصوں کی ریکی کی جا رہی تھی۔

 بم ڈسپوزل اسکواڈ نے ڈرون کا معائنہ کرنے کے بعد کلیئرنس دے دی۔ پولیس نے تمام زاویوں سے تحقیقات شروع کر دی ہیں ۔ سی ٹی ڈی ہیڈکوارٹرز کی سکیورٹی ٹیم نے تھانہ ہربنس پورہ میں کارروائی کے لیے درخواست بھی جمع کرا دی۔