قدرت پاکستان پر مہربان، تیل و گیس کا بڑا ذخیرہ دریافت

خیبر پختونخوا کے ضلع کوہاٹ میں تیل اور گیس کا ایک بڑا ذخیرہ دریافت ہوا ہے، جسے ملکی توانائی کے شعبے میں اہم پیش رفت قرار دیا جا رہا ہے۔

تفصیلات کے مطابق نشپا بلاک کے باراگزئی ایکس ون کنویں سے حاصل ہونے والی اس دریافت کے بعد باقاعدہ کمرشل پیداوار کا آغاز کر دیا گیا ہے۔ حکام کا کہنا ہے کہ اس منصوبے سے ملک کو قیمتی زرمبادلہ کی بچت میں مدد ملے گی۔

وفاقی وزیر پیٹرولیم علی پرویز ملک نے منصوبے کا افتتاح کرتے ہوئے کہا کہ اس دریافت سے توانائی کی ضروریات پوری کرنے میں سہولت ملے گی اور درآمدات پر انحصار کم ہوگا۔

متعلقہ کمپنی کے مطابق ابتدائی طور پر اس کنویں سے یومیہ پندرہ ہزار بیرل تیل اور تقریباً چار کروڑ پچاس لاکھ مکعب فٹ گیس حاصل ہو رہی ہے، جبکہ مستقبل میں پیداوار مزید بڑھانے کا منصوبہ بھی زیر غور ہے۔