کراچی، ایک اور چوری شدہ موٹر سائیکل کا چالان مالک کو مل گیا

 کراچی: شہر قائد میں چوری شدہ موٹر سائیکلیں تو برآمد نہیں ہو پاتیں، تاہم ای چالان کا سلسلہ شروع ہونے کے بعد ان موٹر سائیکلوں کے چالان اصل مالکان تک کامیابی سے پہنچنے لگے ہیں۔

کراچی میں ایک اور چوری شدہ موٹر سائیکل کا چالان اس کے مالک کو موصول ہو گیا، موٹر سائیکل 22 دسمبر 2025 کو رضویہ کے علاقے میں گھر کے باہر سے چوری ہوئی تھی، اور متاثرہ شخص نے مقدمہ بھی درج کروایا تھا لیکن پولیس اسے تلاش نہ کر سکی تھی۔

موٹر سائیکل 5 جنوری کو ہائپر اسٹار کے پاس سیف سٹی کیمرے میں آئی، پیچھے بیٹھنے والے کے ہیلمٹ نہ پہننے پر 5 ہزار روپے کا چالان ہوا، اور 29 نومبر کو مالک کا خود بھی ہیلمٹ نہ پہننے پر چالان ہوا تھا۔

چالان میں دی گئی اس تصویر میں ایک ملزم کا چہرہ واضح ہے، شہری نے ملزمان کو گرفتار کر کے موٹر سائیکل ریکور کرنے کی اپیل کر دی ہے، شہری نے درخواست کی کہ میرا چالان بھی خارج کیا جائے۔