کراچی، ٹریفک چالان اور پولیس رویے سے تنگ آکر رکشہ ڈرائیور کی خودکشی کی کوشش، بلیڈ سے گلا کاٹ لیا

اسٹیل ٹاؤن: ٹریفک پولیس کی زیادتیوں سے تنگ رکشا ڈرائیور کی خودکشی کی کوشش ناکام بنادی گئی ہے۔

کراچی کے علاقے اسٹیل ٹاؤن میں ٹریفک پولیس کی مبینہ زیادتیوں سے تنگ آکر ایک رکشا ڈرائیور نے خود کو بلیڈ کے وار کر کے زخمی کر لیا۔ 

واقعے کی اطلاع ملتے ہی اسٹیل ٹاؤن پولیس موقع پر پہنچی اور زخمی رکشا ڈرائیور یوسف کو تھانے منتقل کیا جہاں اسے طبی امداد فراہم کی گئی۔

تھانے میں موبائل فون سے بنائی گئی ایک ویڈیو میں رکشا ڈرائیور یوسف نے اپنی پریشانی بیان کرتے ہوئے کہا کہ ٹریفک پولیس آئے روز بھاری جرمانے عائد کرتی ہے اور رکشے تھانے میں بند کر دیے جاتے ہیں۔ 

اس نے سوال کیا کہ "آخر کیا کریں، جرم کا راستہ اختیار کریں؟" یوسف نے مزید بتایا کہ وہ کرائے پر رکشا چلا کر اپنے بچوں کا پیٹ پالتا ہے، لیکن رکشا مالک چالان خود بھرنے کا کہتا ہے، جس سے ان کی مشکلات مزید بڑھ گئی ہیں۔

دوسری جانب، ٹریفک پولیس نے اس معاملے پر اپنا موقف پیش کرتے ہوئے کہا ہے کہ رکشا ڈرائیور یوسف زیادہ سواریاں بٹھا رہا تھا جس پر اس کا چالان کیا گیا ہے۔ پولیس کا یہ بھی کہنا ہے کہ صرف یوسف کا ہی نہیں بلکہ قوانین کی خلاف ورزی پر دیگر رکشوں کے بھی چالان کیے گئے ہیں