کوئٹہ میں پاک فوج کا تربیتی طیارہ حادثے کا شکار، 2 جوان شہید

کوئٹہ کے علاقے نواں کلی کے قریب پاک فوج کا مشاق تربیتی طیارہ تکنیکی خرابی کے باعث گر کر تباہ ہوگیا، حادثے میں پاک فوج کے دو پائلٹ شہید ہوگئے۔

پاک فوج کے شعبۂ تعلقات عامہ (آئی ایس پی آر) کے مطابق حادثہ پیر کی دوپہر پیش آیا۔ شہید ہونے والوں میں انسٹرکٹر پائلٹ میجر حسنین شہزاد ہمایوں اور زیرِ تربیت پائلٹ کیپٹن عبدالصمد شامل ہیں۔

صدر مملکت آصف علی زرداری اور وزیراعظم شہباز شریف نے دونوں پائلٹوں کی شہادت پر افسوس کا اظہار کرتے ہوئے ان کے اہلِ خانہ سے تعزیت کی۔

وفاقی وزیر داخلہ محسن نقوی نے بھی حادثے میں پائلٹوں کی شہادت پر دکھ اور افسوس کا اظہار کیا۔ ان کا کہنا تھا کہ غم کی اس گھڑی میں وہ شہدا کے اہلِ خانہ کے ساتھ کھڑے ہیں۔