کراچی: گٹر کی صفائی کے دوران 3 خاکروب دم گھٹنے سے ہلاک

کراچی کے علاقے گارڈن عثمان آباد میں گٹر کی صفائی کے دوران 3 افرادہلاک جبکہ چوتھے شخص کی حالت تشویش ناک ہے،، مرنے والوں میں باپ بیٹا بھی شامل ہیں۔

شہر قائد میں ایک اور افسوسناک واقعہ  پیش آیا۔ گارڈن کے علاقے عثمانہ آباد صدیق وہاب روڈ پر گٹر کی صفائی کے دوران تین افراد موت کے منہ میں چلے گئے۔

تینوں افراد کو علاقہ مکینوں نے صفائی کے لئے بلایا تھا اسی دوران ایک خاکروب ڈوبا اسی کو بچاتے ہوئے 2 مزید خاکروب ڈوب کر جان سے گئے۔ تین میں سے دو افراد آپس میں باپ بیٹے ہیں۔

پولیس کے مطابق عینی شاہدین نے بتایا کہ صفائی کے دوران اچانک 2 خاکروب ایک کے بعد ایک گہرے گٹر میں جا گرے جبکہ انکے بچانے کی کوشش کرنے والا تیسرا شخص بھی واقعے میں ہلاک ہوگیا ۔

ایدھی ذرائع کے مطابق واقعے کی اطلاع ملتے ہی فوری طور پر ریسکیو آپریشن شروع کیا گیا اور ایک نوجوان کی لاش سب سے پہلے نکالی گئی، جس کی شناخت 22 سالہ وشال ولد جورج کے نام سے ہوئی۔

امدادی سرگرمیاں مزید 3 کچھ دیر جاری رہیں، جس کے بعد مزید دو افراد کو نکالا گیا، تاہم دونوں زندگی کی بازی ہار چکے تھے۔

ترجمان ایدھی فائونڈیشن کے مطابق جاں بحق ہونے والوں میں 19 سالہ شاہد ولد خورشید اور 42 سالہ جورج ولد نامعلوم شامل ہیں۔

تینوں افراد کی لاشوں کو ایدھی ایمبولینس کے ذریعے سول اسپتال کے ٹراما سینٹر منتقل کردیا گیا جبکہ خاکروب سمیت 3 افراد کو گٹر  سے نکالنے کی کوشش کرنے والے 26 سالہ فیصل کو نیم بے ہوشی کی حالت میں نکال کر سول اسپتال منتقل کردیا گیا۔