سندھ حکومت کا وفاقی اقدامات کی مکمل حمایت کا اعلان

صوبائی وزیر اطلاعات سندھ شرجیل انعام میمن نے کہا ہے کہ سندھ حکومت موجودہ کشیدہ صورتحال کے پیش نظر توانائی کے بچاؤ اور عوامی سہولت سے متعلق وفاقی حکومت کے تمام فیصلوں پر مکمل عملدرآمد کرے گی۔

اپنے بیان میں انہوں نے واضح کیا کہ صوبائی حکومت ہر سطح پر وفاقی اقدامات کی حمایت جاری رکھے گی، حتیٰ کہ اگر حالات کے مطابق لاک ڈاؤن جیسے فیصلے بھی کرنا پڑے تو ان پر بھی عمل کیا جائے گا۔

شرجیل میمن کا کہنا تھا کہ حکومت کی اولین ترجیحات میں اشیائے ضروریہ کی قیمتوں کو قابو میں رکھنا، ایندھن اور توانائی کی ممکنہ قلت سے بچاؤ اور شہریوں کے لیے زیادہ سے زیادہ پبلک ٹرانسپورٹ کی فراہمی یقینی بنانا شامل ہے۔

انہوں نے مزید کہا کہ عوام کو مشکلات سے بچانے کے لیے تمام ممکنہ اقدامات کیے جا رہے ہیں اور صورتحال معمول پر آنے تک حکومتی کوششیں جاری رہیں گی۔