پاکستان میں 12 ربیع الاول کس تاریخ کو ہوگی؟ پیش گوئی کردی گئی

اسلام آباد: پاکستان کی خلائی تحقیقاتی ایجنسی، سپارکو (SUPARCO) نے اسلامی سال 1447 ہجری کے لیے ربیع الاول کے چاند کی پیش گوئی جاری کردی ہے۔

سپارکو کے مطابق، ربیع الاول کا چاند 24 اگست 2025 کو نظر آنے کا قوی امکان ہے۔ سپارکو کی رپورٹ میں بتایا گیا ہے کہ چاند کی پیدائش 23 اگست کو صبح 11 بج کر 32 منٹ پر ہوگی۔ اس طرح، 24 اگست کی شام کو جب سورج غروب ہوگا، تو چاند کی عمر 31 گھنٹے 36 منٹ ہوگی، جو اسے آسانی سے نظر آنے کے لیے کافی ہے۔

رپورٹ کے مطابق، 24 اگست کو غروب آفتاب کے وقت چاند افق سے 16 ڈگری بلندی پر ہوگا، اور یہ 86 منٹ تک افق پر موجود رہے گا۔ ان عوامل کو دیکھتے ہوئے پاکستان کے بیشتر علاقوں میں چاند کی رؤیت کا امکان روشن ہے۔

اگر چاند 24 اگست کو نظر آتا ہے تو اس حساب سے 12 ربیع الاول 5 ستمبر 2025 بروز جمعے کو ہوگی۔

تاہم، محکمہ موسمیات نے خبردار کیا ہے کہ ملک کے شمالی اور بالائی علاقوں میں موسم ابر آلود رہنے کی وجہ سے چاند کی رؤیت میں مشکلات پیش آسکتی ہیں۔ اس کے برعکس، جنوبی اور وسطی علاقوں میں موسم صاف رہنے کی توقع ہے، جہاں چاند کی واضح رؤیت کا امکان ہے۔

اس پیش گوئی کے بعد، رویت ہلال کمیٹی کا اجلاس 24 اگست کو ہوگا جہاں حتمی فیصلہ کیا جائے گا۔ اگر چاند نظر آجاتا ہے تو یکم ربیع الاول 25 اگست کو ہوگی۔