ایران پر شدید تر حملہ کرنے کے لیے تیار ہیں، اسرائیلی فوج کے سربراہ

تہران: اسرائیلی فوج کے چیف آف اسٹاف ایال زامیر نے اعلان کیا ہے کہ ضرورت پڑنے پر فوج ایران پر ایک اور سخت اور گہرا حملہ کرنے کے لیے تیار ہے۔

میڈیارپورٹس کے مطابق شمالی علاقے کے دورے کے دوران زامیر نے کہا کہ اگر ضرورت پڑی تو فوج ایران کے خلاف فوجی کارروائیوں پر واپس آنے کے لیے پوری طرح تیار ہے۔

 انہوں نے اس بات پر زور دیا کہ اسرائیل کی جانب سے ایرانی سرزمین کے اندر پہلے کیا گیا حملہ ایک شدید اور وسیع تر حملے کے لیے پیش خیمہ تھا۔

زامیر کے مطابق اسرائیلی فورسز اپنے خلاف خطرات کو روکنے اور ایران کے اندر تیزی اور طاقت سے حملے کرنے میں کامیاب رہی ہیں۔

جواب میں ایران نے اپنے اوپر دوبارہ کسی بھی حملے کے خلاف متنبہ کرتے ہوئے اپنی مکمل تیاری کا اعادہ کیا ۔ ایرانی فوج کے بری دستوں کے کمانڈر علی جہانشاہی نے کہا کہ ہمارے ہاتھ ٹریگر پر ہیں اور ہم کسی بھی قسم کے ممکنہ خطرات کا فیصلہ کن جواب دینے کے لیے پوری طرح تیار ہیں۔

انہوں نے مزید کہا کہ بری افواج ہائی الرٹ اور مکمل آپریشنل تیاری کی حالت میں ہیں، اور کسی بھی خطرے کا مقابلہ کرنے اور آخری سانس تک ملک کا دفاع کرنے کے لیے تیار ہیں۔