وزیراعظم نے مسجد اقصی کی بے حرمتی کرنے والے اسرائیلی وزیر کو بے شرم قرار دے دیا

وزیراعظم شہباز شریف نے اسرائیل کے انتہائی دائیں بازو کے قومی سلامتی کے وزیر ایتمار بن گویر کی جانب سے مسجد اقصیٰ کی بے حرمتی کی شدید مذمت کی ہے۔

 اسرائیلی وزیر نے یروشلم میں واقع مسجد اقصیٰ کے احاطے کا دورہ کیا اور وہاں نماز ادا کی، جو کہ بین الاقوامی قوانین کی خلاف ورزی ہے، جن کے مطابق یہود کو اس مقدس مقام پر جانے کی اجازت ہے لیکن وہاں عبادت کی اجازت نہیں۔

مسجد اقصیٰ، جسے یہود ٹیمپل ماؤنٹ کے نام سے جانتے ہیں، مشرق وسطیٰ میں سب سے زیادہ حساس مذہبی مقامات میں سے ایک ہے۔

 وزیراعظم شہباز نے اسرائیلی وزیر اور آباد کاروں کے ایک گروپ کی جانب سے اسرائیلی پولیس کے تحفظ میں مسجد قصیٰ پر "دھاوا بولنے" کی مذمت کی۔

انہوں نے ایکس پر اپنے ایک پوسٹ میں کہا، "اسرائیل کی جانب سے اس مقدس مقام کی بے حرمتی نہ صرف دنیا بھر کے مسلمانوں کے لیے توہین آمیز ہے بلکہ یہ بین الاقوامی قانون اور انسانیت کے اجتماعی ضمیر پر براہ راست حملہ ہے۔"

 انہوں نے مزید کہا کہ "اس طرح کے منظم اشتعال انگیز اقدامات اور الحاق کے غیر ذمہ دارانہ مطالبات امن کے امکانات کو خطرے میں ڈالتے ہیں۔"

وزیراعظم نے خبردار کیا کہ اسرائیل کے "بے شرم اقدامات فلسطین اور وسیع تر خطے میں کشیدگی کو جان بوجھ کر بھڑکا رہے ہیں، جس سے مشرق وسطیٰ مزید عدم استحکام اور تنازعات کی طرف بڑھ رہا ہے۔" انہوں نے پاکستان کے اس عاجلانہ مطالبے کا اعادہ کیا کہ فوری جنگ بندی کی جائے، تمام جارحانہ کارروائیاں بند کی جائیں اور بین الاقوامی قانون اور اقوام متحدہ کی متعلقہ قراردادوں کے مطابق ایک آزاد اور قابل عمل فلسطینی ریاست کے قیام کے لیے ایک معتبر امن عمل کو بحال کیا جائے، جس کا دارالحکومت القدس الشریف ہو۔

وزارت خارجہ نے بھی اس بے حرمتی کی مذمت کی اور خبردار کیا کہ اس طرح کے اشتعال انگیز اقدامات خطے میں "تباہ کن تشدد کے ایک سلسلے" کو جنم دے سکتے ہیں۔ 

وزارت نے عالمی برادری سے مطالبہ کیا کہ وہ اسرائیل کو اس کے اقدامات کا ذمہ دار ٹھہرانے اور مذہبی مقامات کی حرمت کے تحفظ کے لیے فوری اور ٹھوس اقدامات کرے۔