نیتن یاہو کا اقتدار ختم، اسرائیلی صدر کی اپوزیشن کو حکومت بنانے کی دعوت

اسرائیل کے صدر آئزک ہرزوگ نے سابق آرمی چیف اور حزبِ اختلاف کے رہنما گاڈی آئزن کوٹ کو نئی حکومت تشکیل دینے کا پہلا موقع دینے کا اعلان کیا ہے۔

یہ فیصلہ سیاسی جماعتوں کے رہنماؤں سے مشاورت اور پارلیمانی ارکان کی سفارشات کا جائزہ لینے کے بعد کیا گیا۔ جس کا واضح مطلب ہے کہ نیتن یاہو کا دور اقتدار ختم ہوگیا۔

صدارتی دفتر کے مطابق مشاورت کے دوران آئزن کوٹ کو حکومت بنانے کے لیے زیادہ ارکان کی حمایت حاصل ہوئی۔ انہیں حکومت سازی کا باضابطہ مینڈیٹ اتوار کو یروشلم میں صدارتی رہائش گاہ پر ہونے والی تقریب میں دیا جائے گا۔

اسرائیل میں 27 اکتوبر کو ہونے والے انتخابات کے بعد کسی بھی سیاسی اتحاد کو پارلیمان میں حکومت بنانے کے لیے درکار 61 نشستوں کی اکثریت نہیں مل سکی۔

پارلیمان کی 120 نشستوں میں سے سابق وزیراعظم بنیامین نیتن یاہو کے اتحاد نے 53 نشستیں حاصل کیں، جبکہ آئزن کوٹ کی قیادت میں حزبِ اختلاف کے اتحاد کو 48 نشستیں ملیں۔ عرب جماعتوں نے مجموعی طور پر 19 نشستیں جیتیں۔

حکومت بنانے کے لیے آئزن کوٹ کو دیگر جماعتوں کی حمایت حاصل کرنا ہوگی۔ انہیں حکومت سازی کے لیے 28 دن دیے جائیں گے، جس میں ضرورت پڑنے پر مزید 14 دن کی توسیع بھی ممکن ہے۔