سالے نے بہنوئی کو فائرنگ کرکے قتل کردیا

 کراچی:  بھینس کالونی میں سالے نے سینے پر گولی مار کر اپنے بہنوئی کو قتل کردیا، واردات کے بعد ملزم فرار ہوگیا، مقتول نے پسند کی شادی کی تھی۔

تفصیلات کے مطابق کراچی کے علاقہ بھینس کالونی پیرانو گوٹھ میں سالے نے فائرنگ کرکے بہنوئی کو موت کے گھاٹ اتار دیا۔ ،پولیس کے مطابق مقتول کی شناخت 41سالہ عبداللطیف کے نام سے ہوئی ہے، مقتول نے ملزم دیدار کی بہن سے پسند کی شادی کی تھی۔

پولیس حکام کے مطابق مقتول عبداللطیف کو سینے پر ایک گولی لگی جو اس کی موت کی وجہ بنی، واردات کے بعد ملزم فرار ہوگیا جس کی تلاش کیلیے کارروائی کی جارہی ہے۔

مقتول بہنوئی کی لاش ضابطے کی کارروائی کے لئے اسپتال منتقل کردی گئی ہے، پوسٹ مارٹم کے بعد لاش کو لواحقین کے حوالے کردیا گیا۔