پیٹرولیم مصنوعات کی قیمتوں میں کمی کا نوٹی فکیشن جاری

وزیراعظم شہباز شریف کے اعلان کے بعد حکومت نے پیٹرولیم مصنوعات کی قیمتوں میں کمی کا نوٹی فکیشن جاری کردیا جس پر رات 12 بجے کے بعد سے اطلاق ہوگا۔

حکومت کی جانب سے جاری نوٹی فکیشن کے مطابق پیٹرول کی فی لیٹر قیمت میں 22 روپے کی کمی کی گئی ہے جس کے بعد فی لیٹر قیمت 381 روپے 78 پیسے پر پہنچ گئی۔

اسی طرح ہائی اسپیڈ ڈیزل کی قیمت 22 روپے کمی سے 380 روپے 78 پیسے پر پہنچ گئی۔ نئی قیمتوں کا اطلاق رات 12 بجے سے اگلے ایک ہفتے کیلیے ہوگا۔

وزیراعظم نے کہا ہے کہ حکومت عوام کو زیادہ سے زیادہ سہولت فراہم کرنے کے لیے اقدامات جاری رکھے ہوئے ہے اور معاشی گنجائش پیدا ہونے پر اس کا فائدہ عوام تک پہنچایا جا رہا ہے۔

انہوں نے کہا کہ گزشتہ ہفتے بھی پیٹرولیم مصنوعات کی قیمتوں میں کمی کی گئی تھی اور عوام کو ریلیف دینے کی پالیسی پر عمل جاری رہے گا۔

حکومت کے مطابق ملک میں مشکل معاشی حالات کے باوجود عوامی ریلیف کو ترجیح دی جا رہی ہے اور ایندھن کی دستیابی کو یقینی بنانے کے لیے بھی ضروری اقدامات کیے گئے ہیں۔