پارہ 50 ڈگری تک پہنچنے کی پیشگوئی، شہریوں کو احتیاطی تدابیر پر عمل کرنے کی ہدایت

محکمہ موسمیات نے سندھ بھر میں شدید گرمی کی لہر سے خبردار کرتے ہوئے کہا ہے کہ آئندہ چند روز کے دوران بعض علاقوں میں درجہ حرارت پچاس ڈگری سینٹی گریڈ تک پہنچ سکتا ہے

محکمے کے مطابق سندھ کی بالائی فضا میں موجود ہائی پریشر سسٹم مزید مضبوط ہونے کا امکان ہے، جس کے باعث صوبے کے بیشتر اضلاع میں اکتیس مئی تک درمیانی سے شدید ہیٹ ویو برقرار رہ سکتی ہے۔

محکمہ موسمیات نے شہریوں، خصوصاً بچوں، خواتین اور بزرگ افراد کو احتیاطی تدابیر اختیار کرنے کی ہدایت کی ہے، جبکہ کاشتکاروں کو بھی فصلوں اور مویشیوں کی حفاظت کے لیے خصوصی توجہ دینے کا مشورہ دیا گیا ہے۔

پیش گوئی کے مطابق سکھر، لاڑکانہ اور دادو سمیت مختلف اضلاع میں درجہ حرارت سینتالیس سے پچاس ڈگری سینٹی گریڈ تک جا سکتا ہے۔ اسی طرح تھرپارکر، بدین، حیدرآباد، میرپورخاص اور جامشورو میں پارہ چوالیس سے سینتالیس ڈگری سینٹی گریڈ کے درمیان رہنے کا امکان ظاہر کیا گیا ہے۔

محکمہ موسمیات کا کہنا ہے کہ شدید گرمی کے باعث بجلی کی طلب میں بھی اضافہ ہو سکتا ہے، اس لیے شہریوں کو غیر ضروری بجلی استعمال نہ کرنے کی ہدایت کی گئی ہے۔

دوسری جانب کراچی میں پیر اور منگل کے روز درجہ حرارت چونتیس سے چھتیس ڈگری سینٹی گریڈ جبکہ بدھ کو پینتیس سے سینتیس ڈگری سینٹی گریڈ تک رہنے کی توقع ہے۔ محکمہ موسمیات کے مطابق شہر میں سمندری ہوائیں معمول کے مطابق چلتی رہیں گی، جس سے گرمی کی شدت نسبتاً کم محسوس ہوگی۔