کراچی، غیر قانونی مقیم افغان باشندوں کے گرد گھیرا تنگ، متعدد گرفتار

کراچی: شہر قائد میں غیر قانونی طور پر مقیم افغان باشندوں کے خلاف قانون نافذ کرنے والے اداروں نے بڑا آپریشن شروع کر دیا۔

کارروائی میں رینجرز، سی ٹی ڈی اور سہراب گوٹھ پولیس نے حصہ لیا جبکہ ڈی ایس پی اورنگزیب خٹک آپریشن کی قیادت کر رہے تھے۔

ذرائع کے مطابق کراچی کے علاقے سہراب گوٹھ میں اس مشترکہ آپریشن کے دوران متعدد مشتبہ افراد کو حراست میں لے لیاگیاہے، جن سے تحقیقات کا عمل جاری ہے۔

آپریشن کا مقصد غیر قانونی مقیم افراد کی نشاندہی، شناختی کاغذات کی تصدیق اور امن و امان کے قیام کو یقینی بنانا ہے۔

ڈی ایس پی سہراب گوٹھ اورنگزیب خٹک کے مطابق، یہ کارروائی قانونی رہائش کے بغیر مقیم افغان باشندوں کے خلاف جاری قومی پالیسی کے تحت کی جا رہی ہے۔

حکام کے مطابق، زیر حراست افراد کے کوائف اور دستاویزات کی جانچ کے بعد مزید قانونی کارروائی عمل میں لائی جائے گی۔