کراچی: فلیٹ سے ملی خواتین کی لاشوں کا پوسٹ مارٹم مکمل، پولیس سرجن کا اہم بیان

کراچی: گلشن اقبال میں گھر سے ملنے والی خواتین کی لاشوں پر تشدد کے نشانات نہیں پائے گئے۔ پولیس سرجن کراچی ڈاکٹر سمیعہ طارق کے مطابق گلشن اقبال میں گھر سے ملنے والی 3 خواتین کی لاشوں کا پوسٹ مارٹم کرلیا گیا ہے۔

انہوں نے بتایا کہ تینوں خواتین کی لاشوں پر تشدد کا کوئی نشان نہیں، لاشوں کا پوسٹ مارٹم کرکے کیمیائی تجزیے کیلئے خون اور مختلف اعضا سے نمونے حاصل کرلیے گئے ہیں تاہم موت کی اصل وجہ لیبارٹری رپورٹ آنے کے بعد واضح ہوگی۔

پولیس سرجن نے بتایا کہ موت کی اصل وجہ لیبارٹری رپورٹ آنے کے بعد واضح ہوگی تاہم بے ہوشی  کی حالت میں ملنے والے نوجوان کی حالت خطرے سے باہر ہے۔

پولیس حکام  کے مطابق واقعے کا مقدمہ سرکار کی مدعیت میں درج کیا جائے گا اور گھر کے اطراف کی سی سی ٹی وی  بھی حاصل کی جارہی ہیں۔

واضح رہے کہ گزشتہ روز کراچی کے علاقے گلشن اقبال میں رہائشی فلیٹ سے 3 خواتین کی لاشیں برآمد ہوئی تھی۔

ایس ایس پی ایسٹ  کے مطابق فلیٹ سے ملنے والی لاشیں ماں، بیٹی اوربہو کی ہیں، ایسے شواہد نہیں مل سکے جس سے اموات کا تعین کیا جاسکے، بظاہر زہریلی چیز کھانے کے بعد خواتین کی اموات ہوئی ہیں۔