کال سننے کے بعد ایس پی نے اہلکار سے گن چھین کر خود کو گولی مارلی، جاں بحق

اسلام آباد کے انڈسٹریل ایریا علاقے کے ایس پی عدیل اکبر مبینہ طور پر خود کو گولی مارنے کے باعث جاں بحق ہوگئے۔

پولیس ذرائع کے مطابق، ایس پی عدیل اکبر کو شدید زخمی حالت میں اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گئے۔

ابتدائی اطلاعات کے مطابق، ایس پی نے گن مین سے اسلحہ لے کر خود پر فائر کیا۔ واقعے کے وقت موقع پر موجود اہلکاروں اور گن مین کو تحقیقات کے لیے حراست میں لے لیا گیا ہے۔

ذرائع کا کہنا ہے کہ ایس پی نے ایک فون کال موصول ہونے کے فوراً بعد خود کو گولی ماری، جب کہ پولیس نے موبائل فون کا ڈیٹا اور کال ریکارڈ حاصل کرنا شروع کر دیا ہے۔

پولیس حکام کے مطابق، واقعے کی وجوہات جاننے کے لیے اعلیٰ سطح کی تحقیقات جاری ہیں۔