چائنا پورٹ جوڑے کا قتل، لڑکے نے اسلام قبول کر کے نکاح کیا تھا

کراچی میں چائنہ پورٹ کے قریب ایک جوڑے کی ہلاکت کے بارے میں مزید تفصیلات سامنے آئی ہیں۔

پولیس نے تصدیق کی ہے کہ یہ ایک ٹارگٹڈ قتل تھا، اور دونوں مقتولین کو سر کے پچھلے حصے میں ایک ایک گولی ماری گئی۔ اس واقعے سے متعلق جو نیا انکشاف ہوا ہے وہ یہ ہے کہ مقتول ساجد مسیح نے 22 جولائی 2025 کو اسلام قبول کیا تھا، اور اسی دن انہوں نے 18 سالہ ثناء آصف سے کورٹ میرج کی تھی۔

ڈی آئی جی ساؤتھ اسد رضا نے بتایا کہ جائے وقوعہ سے ملنے والے موبائل فون میں سم موجود نہیں تھی، جس کی وجہ سے مقتولین کے رہائشی مقام کا تعین کرنا مشکل ہو رہا ہے۔ 

تاہم، پولیس ثناء آصف کے گھر والوں سے رابطے میں ہے جو گوجرانوالہ سے کراچی آ رہے ہیں۔ بوٹ بیسن پولیس نے سرکار کی مدعیت میں دہرے قتل کا مقدمہ درج کر لیا ہے، اور تحقیقات جاری ہیں۔

 ڈی آئی جی ساؤتھ کا کہنا ہے کہ ملزمان کو جلد گرفتار کر لیا جائے گا۔

مقتولین کی شناخت 30 سالہ ساجد مسیح ولد عارف مسیح اور 18 سالہ ثناء آصف دختر محمد آصف کے نام سے ہوئی ہے۔

 ان کا تعلق گوجرانوالہ کے ایک ہی گاؤں، ڈاک خانہ لالہ پل، عبداللہ پور، تحصیل نوشہرہ ورکاں سے تھا۔ نکاح نامہ منظر عام پر آنے کے بعد یہ بات واضح ہو گئی ہے کہ وہ میاں بیوی تھے۔

دلچسپ بات یہ ہے کہ مقتولہ ثناء آصف کے بھائی وقاص علی نے 17 جولائی 2025 کو تھانہ تتلے علی، ضلع گوجرانوالہ میں مقتول ساجد مسیح کے خلاف ثناء آصف کے اغوا کا مقدمہ درج کرایا تھا۔ اس سے ظاہر ہوتا ہے کہ اس واقعے کی جڑیں گہری ہو سکتی ہیں۔

پولیس کے مطابق، مقتولین کے پاس سے ایک موبائل فون، نقدی اور کچھ پاسپورٹ سائز تصاویر ملی ہیں۔ پولیس کا شبہ ہے کہ قاتلوں کی تعداد کم از کم دو تھی۔