باجوڑ میں ہیضے کی وبا، ایک ہی خاندان کے 10 افراد متاثر، دو بچیاں جاں بحق

باجوڑ کی تحصیل اتمان خیل کے علاقے بانڈگئی میں ہیضے کی وبا پھیلنے کے باعث ایک ہی خاندان کے 10 افراد متاثر ہوگئے، جبکہ دو کمسن بچیاں جان کی بازی ہار گئیں۔

جاں بحق ہونے والی بچیوں کی شناخت 9 سالہ علیشہ بی بی اور 4 سالہ پاکیزہ بی بی کے نام سے ہوئی ہے۔ اسپتال ذرائع کے مطابق متاثرہ خاندان کا تعلق لوئر دیر سے ہے، جبکہ دیگر متاثرہ افراد کو علاج کے لیے تیمرگرہ اسپتال منتقل کر دیا گیا ہے۔

واقعے کے بعد محکمہ صحت نے فوری اقدامات شروع کر دیے ہیں۔ حکام کے مطابق ڈپٹی کمشنر باجوڑ اور ضلعی ہیلتھ افسر کی ہدایت پر وبا سے نمٹنے والی ٹیم نے متاثرہ علاقے کا دورہ کیا اور صورتحال کا جائزہ لیا۔

محکمہ صحت کی ٹیم نے علاقے سے پانی کے نمونے حاصل کیے ہیں، جبکہ متاثرہ خاندان کو ضروری ادویات، او آر ایس اور دیگر طبی سہولیات فراہم کر دی گئی ہیں۔

حکام کا کہنا ہے کہ صورتحال کی مسلسل نگرانی کی جا رہی ہے اور علاقے میں طبی سہولیات کی فراہمی جاری ہے۔ وبا پر قابو پانے کے لیے ہنگامی اقدامات بھی کیے جا رہے ہیں۔