وزیراعظم کے مشیر کی اسرائیلی عہدیدار سے ملاقات، مشتاق احمد کی شدید تنقید

لندن میں ہونے والے ٹورزم فیئر کے دوران وزیراعظم شہباز شریف کے مشیر اور نیشنل کوآرڈینیٹر سردار الیاس خان کی اسرائیلی اہلکار سے مصافحہ کرنے کی ویڈیو سامنے آنے کے بعد سوشل میڈیا پر سخت ردِعمل دیکھنے میں آیا ہے۔

ویڈیو میں انہیں اسرائیلی ٹورزم منسٹری کے ڈائریکٹر جنرل مائیکل اِزحاکوف سے ہاتھ ملاتے دیکھا گیا۔ یہ ملاقات ورلڈ ٹریول مارکیٹ لندن میں پاکستانی پویلین کے داخلی دروازے کے قریب ہوئی۔

سابق سینیٹر مشتاق احمد نے اس واقعے پر شدید ردِعمل دیتے ہوئے اسے فلسطینیوں کے ساتھ "غداری" قرار دیا۔ انہوں نے کہا کہ فلسطینیوں کے قاتلوں سے ہاتھ ملانا قبلۂ اول اور غزہ کے شہدا کی توہین ہے، قوم ایسے اقدامات کو کبھی معاف نہیں کرے گی۔

پاکستان اسرائیل کو تسلیم نہیں کرتا، اس کے باوجود اس ملاقات نے حکومتی پالیسی پر سوالات کھڑے کر دیے ہیں۔

تحریک انصاف نے بھی اس واقعے پر وضاحت کا مطالبہ کیا ہے۔ پارٹی کے سرکاری اکاؤنٹ نے ملاقات کی ویڈیو شیئر کرتے ہوئے کہا کہ پاکستان کے سرکاری مؤقف سے کسی بھی قسم کا انحراف قابلِ قبول نہیں۔

رواں سال کچھ پاکستانی شہریوں کے اسرائیل کے دورے کی خبریں بھی سامنے آئی تھیں، جبکہ پاکستانی شہریوں کے لیے اسرائیل کا سفر اب بھی ممنوع ہے۔