اسرائیلی وزیراعظم سے شہباز شریف کی ملاقات کا دعوی کرنے پر پی ٹی آئی رہنما کیخلاف مقدمہ درج

اسلام آباد: نیشنل سائبر کرائم انویسٹی گیشن ایجنسی (NCCIA) اسلام آباد نے سابق خاتون رکن قومی اسمبلی شاندانہ گلزار خان کے خلاف ریاست مخالف سرگرمیوں کے الزام میں کارروائی کرتے ہوئے سائبر کرائم ایکٹ 2016 کے تحت مقدمہ درج کر لیا۔

تفصیلات کے مطابق، ملزمہ کے خلاف مقدمہ نمبر 296/2025 درج کیا گیا ہے، جس میں سیکشن 11، 20 اور 26-اے آف پی ای سی اے کے تحت الزامات عائد کیے گئے ہیں۔

تحقیقات میں انکشاف ہوا ہے کہ شاندانہ گلزار نے سوشل میڈیا پلیٹ فارم “ایکس” (سابق ٹوئٹر) پر ریاست مخالف، گمراہ کن اور اشتعال انگیز مواد شیئر کیا، جس میں جعلی ٹویٹس اور ویڈیوز شامل تھیں۔

تحقیقی رپورٹ کے مطابق، ملزمہ نے اپنے اکاؤنٹ سے ایسے بیانات اور تصاویر پھیلائیں جن میں ریاستی اداروں کے خلاف نفرت انگیز مواد اور نسلی و لسانی تعصب کو ہوا دینے کی کوشش کی گئی۔

مزید یہ کہ، شاندانہ گلزار نے وزیراعظم پاکستان سے متعلق ایک جعلی تصویر شیئر کی اور غلط معلومات پھیلائیں جن میں اسرائیلی وزیرِاعظم سے مبینہ ملاقات کا الزام لگایا گیا۔

تحقیقات کے مطابق، یہ جھوٹی خبر دانستہ طور پر پھیلائی گئی جس کا مقصد عوام میں خوف، بے چینی اور ریاستی اداروں کے خلاف بداعتمادی پیدا کرنا تھا۔

این سی سی آئی اے کے مطابق، ریاست مخالف سوشل میڈیا مہم میں شامل دیگر عناصر اور معاونین کی نشاندہی کے لیے مزید تحقیقات جاری ہیں۔