قیام پاکستان کی 150 سے زائد نایاب اور تصویریں غائب ہونے کا انکشاف

سیالکوٹ: علامہ اقبال لائبریری سیالکوٹ سے 'تحریک پاکستان' کی نایاب اور تاریخی تصاویر کا مجموعہ غائب ہونے پر شدید تشویش کا اظہار کیا گیا ہے۔

سابق ناظم رانا افتخار رسول، جنہوں نے 2006 میں اس مجموعے کو لائبریری تک پہنچانے میں اہم کردار ادا کیا تھا، نے اس واقعے پر گہرے دکھ کا اظہار کیا ہے۔

رانا افتخار رسول کے مطابق، یہ تصاویر پاکستان نظریہ انسٹی ٹیوٹ کے تعاون اور تحصیل میونسپل ایڈمنسٹریشن (ٹی ایم اے) کی مدد سے حاصل کی گئی تھیں۔

انہوں نے کہا کہ یہ صرف چوری نہیں، بلکہ ہمارے قومی ورثے کے ایک اہم حصے کا نقصان ہے۔ ان تصاویر کو نمائش میں رکھنے کا مقصد نئی نسل کو تحریک پاکستان میں دی گئی قربانیوں سے آگاہ کرنا تھا۔

عوامی، سماجی اور سیاسی حلقوں نے اس واقعے کی شدید مذمت کرتے ہوئے اسے شدید غفلت اور ممکنہ بدعنوانی کا نتیجہ قرار دیا ہے۔ بہت سے افراد نے فوری تحقیقات کا مطالبہ کیا ہے اور خبردار کیا ہے کہ اگر یہ تصاویر برآمد نہ ہوئیں تو ملک کی تاریخی شناخت کا ایک ناقابل تلافی حصہ ہمیشہ کے لیے ضائع ہو جائے گا۔

اس واقعے پر میونسپل کمیٹی کے ایڈمنسٹریٹر عرفان انور، چیف میونسپل آفیسر رانا محمود احمد اور علامہ اقبال لائبریری کے انچارج محمد طارق سمیت دیگر اہم افسران سے رابطہ کرنے کی بار بار کوششیں ناکام رہیں۔

حکام کی جانب سے تاحال اس چوری کے حوالے سے کوئی باضابطہ بیان جاری نہیں کیا گیا ہے۔