حقیقی آزادی مارچ کیسز میں علی امین گنڈا پور کو گرفتار کرنے کا حکم

ڈسٹرکٹ اینڈ سیشن کورٹس اسلام آباد نے حقیقی آزادی مارچ کیسز میں علی امین گنڈا پور کو گرفتار کرنے کا حکم دے دیا۔

تفصیلات کے مطابق اسلام آباد کی مقامی عدالت میں علی امین گنڈا پور سمیت دیگر کیخلاف حقیقی آزادی مارچ کیسز کی سماعت ہوئی، جس میں عدم حاضری پر عدالت نے 2 مقدمات میں علی امین گنڈا پور کے وارنٹ گرفتاری جاری کردیئے۔

جوڈیشل مجسٹریٹ مبشر حسن چشتی نے کیس پر سماعت کی اور ریمارکس دیے کہ علی امین گنڈا پور متعدد بار طلبی کے باوجود عدالت پیش نہیں ہوئے۔

عدالت نے کیس کی مزید سماعت 8 جنوری تک ملتوی کی اور اگلی سماعت پر ہر صورت علی امین گنڈا پور کو گرفتار کر کے پیش کرنے کا حکم دیا۔

اس مقدمے میں بانی پی ٹی آئی، شاہ محمود قریشی، زرتاج گل ودیگر دونوں مقدمات سے بری ہوچکے ہیں جبکہ علی امین گنڈا پور ودیگر کیخلاف تھانہ بارہ کہو میں 2 مقدمات درج ہیں۔