فیصل واؤڈا کا نواز شریف کی میڈیکل رپورٹس سے متعلق چونکا دینے والا انکشاف

سینیٹر فیصل واوڈا کے ایک پرانے انٹرویو کا کلپ انٹرنیٹ پر وائرل ہو گیا ہے جس میں وہ سابق وزیرِ اعظم نواز شریف کی پلیٹلیٹس رپورٹس کے جعلی ہونے کا دعویٰ کر رہے ہیں۔

یہ بیان انہوں نے سینئر صحافی کامران شاہد کے ٹاک شو میں دیا تھا اور کہا تھا کہ "ہم نے نواز شریف کی پلیٹلیٹس رپورٹس گھر پر بیٹھ کر بنائی تھیں"۔

فیصل واوڈا کے مطابق، انہوں نے اس بات کا انکشاف اس وقت کی کابینہ میٹنگ میں بھی کیا تھا اور مسلم لیگ (ن) کے رہنما محمد زبیر اور جاوید لطیف بھی اس کے گواہ ہیں۔

واضح رہے کہ اکتوبر 2019 میں، سروسز ہسپتال لاہور نے اسلام آباد ہائی کورٹ میں نواز شریف کی میڈیکل رپورٹ جمع کرائی تھی جس میں ان کی صحت کو "انتہائی تشویشناک" قرار دیا گیا تھا۔

رپورٹ میں کہا گیا تھا کہ ان کے پلیٹلیٹس کی تعداد 6,000 تک گر گئی ہے، جس کی وجہ سے انہیں اندرونی اور بیرونی خون بہنے کا خطرہ ہے۔ اسی رپورٹ کی بنیاد پر نواز شریف کو علاج کے لیے لندن جانے کی اجازت دی گئی تھی، جہاں وہ چار سال رہے۔