علیمہ خان نے سلمان اکرم راجہ کے ساتھ تنازع پر خاموشی توڑ دی

پاکستان تحریک انصاف کے بانی عمران خان کی بہن علیمہ خان نے پارٹی کے سیکریٹری جنرل سلمان اکرم راجہ سے تلخ کلامی کی خبروں کی تردید کی ہے۔

اڈیالہ جیل کے باہر میڈیا سے گفتگو کرتے ہوئے انہوں نے کہا کہ سلمان اکرم راجہ ہمارے وکیل اور خاندان کا حصہ ہیں، اور ان کا کوئی اپنا مسئلہ ہو سکتا ہے۔

علیمہ خان اور ان کی بہن عظمیٰ خان نے بانی پی ٹی آئی سے ملاقات کے بعد بتایا کہ انہیں عمران خان کی سپریم کورٹ سے ضمانت کے بعد بھی ان کے بھانجوں کی گرفتاری کی سمجھ نہیں آئی۔

انہوں نے اس کارروائی کو خوف اور بچوں سے ڈرنے کی علامت قرار دیا۔

ضمنی انتخابات کے حوالے سے عظمیٰ خان نے واضح کیا کہ عمران خان نے پارٹی کو ضمنی الیکشن نہ لڑنے کا پیغام دیا تھا۔ ان کا کہنا تھا کہ الیکشن میں جانے سے پارٹی کو نقصان ہوگا اور غیر قانونی نااہلیوں کو جواز مل جائے گا۔

عمران خان کا مؤقف تھا کہ پارٹی کو الیکشن کی بجائے تحریک پر توجہ دینی چاہیے، کیونکہ وہ انہیں جیتنے نہیں دیں گے۔ اس دوران جب ایک صحافی نے بانی کے موقف کو ان کے خاندان کا موقف قرار دیا تو علیمہ خان نے سخت ردِ عمل ظاہر کرتے ہوئے میڈیا سے بات چیت بند کرنے کی دھمکی بھی دی۔

انہوں نے کہا کہ جب وہ میڈیا سے بات کرتی ہیں تو ان کا احترام کیا جائے، اور ایسے 'شیطانی سوالات' نہ پوچھے جائیں۔