کراچی میں چینی کا بحران شروع، سب سے بڑی ہول سیل نے فروخت روک دی

کراچی میں بھی چینی کا بحران پیدا ہونے کا خطرہ بڑھ گیا ہے کیونکہ سب سے بڑی ہول سیل مارکیٹ کے دکانداروں نے چینی کی فروخت بند کرنے کا اعلان کردیا۔

تفصیلات کے مطابق جوڑیا بازار کے تاجروں نے چینی کی فروخت ہفتے کے روز سے بند کردی اور کہا ہے کہ ہول سیل میں چینی 174 روپے فی کلو سے تجاوز کرچکی ہے۔

انہوں نے کہا کہ جب 174 ہول سیل میں ملے گی تو کیسے اسے سستے داموں فروخت کریں، انتظامیہ نے علیحدہ پریشان کررکھا ہے، ڈی سی ساؤتھ سے مذاکرات بھی ناکام ہوگئے۔

ان کا کہنا تھا کہ ہمیں ہول سیل میں چینی 170روپے کلوفروخت کرنے کا کہا گیا ہے۔ مہنگی چینی خرید کر سرکاری نرخ پر فروخت نہیں کرسکتے۔

دوسری جانب شوگر ملز ایسوسی ایشن نے اپنے بیان میں کہا کہ ملز کا تعلق صرف ایکس مل قیمتوں تک ہوتا ہے۔ چینی کی ریٹیل قیمت کا تعین اب حکومت کر رہی ہے۔