ایک اور مغوی کی لاش اسرائیل کے حوالے

حماس نے غزہ میں جاری جنگ بندی معاہدے کے تحت ایک اور اسرائیلی مغوی کی لاش بین الاقوامی ادارۂ ریڈ کراس کے حوالے کر دی ہے۔

اسرائیلی فوج کے ترجمان نے تصدیق کی ہے کہ لاش ریڈ کراس کے ذریعے موصول ہوئی، جس کے بعد لاش کو اسرائیل منتقل کر دیا گیا۔

حکام کے مطابق اب تک 28 مغویوں میں سے صرف 9 کی لاشیں واپس ملی ہیں، جب کہ باقی کی تلاش جاری ہے۔

حماس کے ترجمان نے کہا ہے کہ متعدد لاشیں اب بھی ملبے کے نیچے دبی ہوئی ہیں اور انہیں نکالنے کے لیے بھاری مشینری اور محفوظ راستوں کی ضرورت ہے۔

ترجمان نے مزید کہا کہ اسرائیلی بمباری اور مسلسل پابندیاں امدادی کارروائیوں میں رکاوٹ بن رہی ہیں۔

اسرائیلی ردعمل

دوسری جانب اسرائیلی حکام نے الزام عائد کیا ہے کہ حماس کو لاشوں کی صحیح معلومات حاصل ہیں، تاہم وہ دانستہ طور پر تاخیر کر رہی ہے تاکہ سیاسی دباؤ بڑھایا جا سکے۔

واضح رہے کہ حماس نے گزشتہ روز بھی بیان دیا تھا کہ سرنگوں کے انہدام کے باعث کئی یرغمالیوں کی لاشیں تباہ حال علاقوں میں دبی ہوئی ہیں، اور ان کی بازیابی میں مزید وقت لگ سکتا ہے۔