اسرائیلی قید میں شہید ہونے والے فلسطینیوں کی تعداد 285 تک پہنچ گئی

غزہ کے جنوبی علاقے خان یونس کے نصر اسپتال نے بتایا ہے کہ امریکی ثالثی میں ہونے والے جنگ بندی معاہدے کے تحت مزید 15 فلسطینی شہدا کی میتیں اسپتال منتقل کی گئی ہیں۔

عالمی خبر رساں ادارے اے ایف پی کے مطابق اسپتال انتظامیہ نے تصدیق کی ہے کہ اب تک اس معاہدے کے نتیجے میں 285 فلسطینیوں کی لاشیں وصول کی جا چکی ہیں۔ یہ لاشیں اسرائیلی فوجی اِتائے چن کی لاش کے بدلے میں واپس کی گئیں، جسے حماس نے منگل کے روز اسرائیل کے حوالے کیا تھا۔

معاہدے کے مطابق، اسرائیل کو جب بھی اپنے کسی یرغمالی کی لاش واپس ملتی ہے تو وہ اس کے بدلے 15 فلسطینی شہدا کی میتیں فلسطینی حکام کے حوالے کرتا ہے۔

رپورٹ میں کہا گیا ہے کہ جنگ بندی کے آغاز پر حماس کے قبضے میں 48 اسرائیلی یرغمالی تھے، جن میں سے 20 زندہ اور 28 ہلاک تھے۔ بعد ازاں حماس نے تمام زندہ یرغمالیوں کو رہا کر دیا اور 21 ہلاک قیدیوں کی لاشیں اسرائیل کے حوالے کیں۔

اسرائیلی حکام کا الزام ہے کہ حماس جان بوجھ کر یرغمالیوں کی لاشوں کی واپسی میں تاخیر کر رہی ہے، تاہم حماس کا مؤقف ہے کہ کئی لاشیں تباہ شدہ عمارتوں کے ملبے تلے دبی ہوئی ہیں جس کے باعث عمل سست روی کا شکار ہے۔

حماس نے بین الاقوامی ثالثوں اور ریڈ کراس سے درخواست کی ہے کہ وہ لاشوں کی تلاش اور نکالنے کے لیے ضروری مشینری اور عملہ فراہم کریں۔

واضح رہے کہ دو سال سے جاری اس جنگ میں اب تک 68 ہزار 875 فلسطینی شہید اور 1 لاکھ 70 ہزار 679 افراد زخمی ہو چکے ہیں، جبکہ غزہ کی بڑی آبادی اپنے گھروں سے محروم ہو چکی ہے۔