اے آئی نے قتل کا طریقہ پوچھنے والے کراچی میں بیٹھے نوجوان کو پکڑوادیا

کراچی: پی ای سی ایچ ایس کے رہائشی نوجوان کو فرضی کرائم اسٹوری کی تیاری کے دوران اے آئی سے قتل کے طریقہ کار سے متعلق سوال کرنے پر حراست میں لے لیا گیا، تاہم تحقیقات کے بعد اسے رہا کردیا گیا۔

این سی سی آئی اے حکام کے مطابق نوجوان نے اے آئی پلیٹ فارم ’’کلاوڈ‘‘ پر ایک فرضی کہانی بیان کی، جس میں پولیس اہلکار کی جانب سے اس کے والد کی توہین کا ذکر کرتے ہوئے اس شخص کو قتل کرنے کے طریقے سے متعلق سوال کیا گیا تھا۔

حکام کے مطابق اے آئی سیفٹی گائیڈ نے 4 ستمبر کو سوالات کو مشکوک اور پالیسی کی خلاف ورزی قرار دیتے ہوئے مبینہ سرگرمی کی اطلاع امریکی تحقیقاتی ادارے ایف بی آئی کو دی، جہاں سے معلومات پاکستانی حکام تک پہنچیں۔

این سی سی آئی اے نے پی ای سی ایچ ایس میں کارروائی کرتے ہوئے نوجوان کو حراست میں لیا۔ دوران تفتیش نوجوان نے بتایا کہ وہ فرضی کرائم اسٹوری پر کام کررہا تھا اور حقیقت میں اس کے والد کے ساتھ ایسا کوئی واقعہ پیش نہیں آیا۔

تحقیقات مکمل ہونے کے بعد نوجوان کو رہا کردیا گیا۔ حکام کے مطابق حالیہ دنوں میں بہاولپور سے بھی اے آئی کے ذریعے زہر بنانے سے متعلق معلومات حاصل کرنے کے ایک مبینہ واقعے کی اطلاع سامنے آئی تھی۔