سود و بھتہ مافیاسے مایوس خاتون کی موت، شوہر کی بھی انصاف نہ ملنے پر خودکشی

راولپنڈی: سود و مبینہ بھتہ خوروں سے دل برداشتہ خاتون کی پراسرار موت کے بعد انصاف نہ ملنے پر شوہر نے بھی اپنی زندگی کا خاتمہ کرلیا، اہل خانہ نے لاش کے ساتھ ایس پی کے دفتر پر شدید احتجاج کیا۔

ذرائع کے مطابق اولپنڈی کے تھانہ گوجرخان کے علاقے میں سود و مبینہ بھتہ خوروں سے دل برداشتہ ہوکر خاتون نے انتہائی قدم اُٹھا لیا اور شوہر کے لیے ویڈیو پیغام موبائل میں ریکارڈ کردیے تھے، پولیس معاملے کی تفتیش کررہی تھی۔

رپورٹس کے مطابق خاتون کے شوہر شیراز آفتاب نے بھی خود کو گولی مار کر اپنی زندگی کا خاتمہ کرلیا۔ لواحقین نے لاش لے جا کر ایس پی گوجرخان کے دفتر کے باہر شدید احتجاج کیا۔

مبینہ خودکشی کرنے والے شیراز آفتاب کے والد نے پولیس پر سنگین الزامات عائد کر دیئے، شیراز کے والد نے کہا کہ میرے بیٹے کا قاتل پولیس آفیسر ہے، وہ ملزم کو کرسی پر بٹھا کر اور میرا بیٹا جو مدعی ہے اسے کھڑا کرکے بیان لیتا تھا۔

انہوں نے کہا کہ میرا بیٹا گھر آیا تو رو پڑا بددل ہوکر کہنے لگا کہ ابو مجھے پتا چل گیا ہے کہ  انصاف نا ممکن ہے، بعدازاں ایس پی صدر انعم شیر مظاہرین سے مذاکرات کے لیے دھرنے میں پہنچ گئے۔