کراچی، بارش میں پھنسی خاتون کیساتھ غیر اخلاقی حرکت کرنیوالا ملزم گرفتار

ترجمان ایس ایس پی ضلع شرقی پولیس کے مطابق چند روز قبل بارش کے دوران بنائی گئی ایک وڈیو سوشل میڈیا پر وائرل ہوئی تھی جس میں ایک شخص کو راہ چلتی خاتون کے ساتھ نازیبا حرکت کرتے ہوئے دیکھا گیا۔ 

پولیس کی ابتدائی تفتیش کے مطابق یہ واقعہ ڈسٹرکٹ ایسٹ جمشید ٹاؤن کے علاقے میں پیش آیا تھا۔ ویڈیو منظر عام پر آنے کے بعد ایسٹ پولیس نے ملزم کی تلاش شروع کی۔

 ویڈیو کی بنیاد پر پولیس نے ملزم کی شناخت کی اور کارروائی کرتے ہوئے اسے گرفتار کرلیا۔ ترجمان ایس ایس پی ایسٹ کے مطابق گرفتار شخص کی شناخت حافظ محب اللّٰہ ولد شمس الحق کے نام سے ہوئی ہے۔

ملزم کے خلاف سرکار کی مدعیت میں تھانہ جمشید کوارٹرز میں مقدمہ درج کرلیا گیا ہے۔ مقدمے میں عورت کی عصمت دری کی دفعہ شامل کی گئی ہے۔ جبکہ ملزم کو شاملِ تفتیش کرنے کے بعد عدالت میں پیش کیا جائے گا۔