جشن آزادی پر ہوائی فائرنگ کرنے والے 90 سے زائد ملزمان گرفتار

کراچی میں یوم آزادی کی تقریبات کے دوران ہوائی فائرنگ کے واقعات میں ملوث 90 سے زائد ملزمان کو گرفتار کر لیا گیا۔

پولیس نے ملزمان کے قبضے سے 68 غیر قانونی اسلحہ برآمد کرکے 111 مقدمات درج کر لیے ہیں۔

حکام کے مطابق، ملوث افراد کے خلاف قتل اور اقدام قتل کے اضافی مقدمات بھی درج کیے گئے ہیں۔

شہر کے پولیس سرجن کی رپورٹ کے مطابق، ہوائی فائرنگ کے نتیجے میں 8 سالہ بچی سمیت تین افراد جاں بحق ہوئے، جبکہ 114 دیگر زخمی ہوئے۔

زخمیوں کو مختلف ہسپتالوں میں منتقل کیا گیا، جن میں عباسی شہید ہسپتال میں سب سے زیادہ 43، جناح ہسپتال میں 41، اور شہید بینظیر بھٹو ٹراما سینٹر میں 30 زخمیوں کو لایا گیا۔

حکام نے بتایا کہ اس سال یوم آزادی پر ہوائی فائرنگ سے ہونے والی ہلاکتوں اور زخمیوں کی تعداد حالیہ برسوں میں سب سے زیادہ ہے۔ گزشتہ سال اسی طرح کی تقریبات میں دو افراد جاں بحق اور 100 زخمی ہوئے تھے۔