ازبکستان اور قازقستان کے صدور کو پاکستان کا اعلیٰ ترین سول ایوارڈ دینے کا فیصلہ

صدر مملکت آصف علی زرداری پاکستان کے سرکاری دورے پر آنے والے قازقستان اور ازبکستان کے صدور کو ملک کا اعلیٰ ترین سول اعزاز نشانِ پاکستان عطا کریں گے۔

سرکاری اعلامیے کے مطابق اعزاز دینے کی تقاریب ایوانِ صدر میں منعقد ہوں گی، جہاں صدر مملکت دونوں غیر ملکی سربراہان کو باقاعدہ طور پر نشانِ پاکستان پہنائیں گے۔

نشانِ پاکستان اُن شخصیات کو دیا جاتا ہے جنہوں نے پاکستان کے قومی مفادات اور دوطرفہ تعلقات کے فروغ میں نمایاں کردار ادا کیا ہو۔ یہ اعزاز اکثر دوست ممالک کے سربراہان کو خیر سگالی اور مضبوط سفارتی تعلقات کی علامت کے طور پر دیا جاتا ہے۔

دورے کے موقع پر دونوں صدور کے اعزاز میں سرکاری ضیافتوں کا بھی اہتمام کیا جائے گا۔

تقریبات میں وفاقی کابینہ کے ارکان، پارلیمنٹ کے نمائندے، سفارتی برادری اور اعلیٰ سرکاری حکام کی شرکت متوقع ہے۔