والد سے ملنا چاہتے ہیں مگر حکومت ویزے نہیں دے رہی،قاسم خان کا الزام

پاکستان تحریک انصاف کے بانی اور سابق وزیر اعظم عمران خان کے بیٹے قاسم خان نے حکومت پر الزام عائد کیا ہے کہ وہ جان بوجھ کر ان اور ان کے بھائی کے ویزوں کی درخواستوں پر کارروائی نہیں کر رہی، جس کی وجہ سے وہ اپنے والد سے ملاقات کے لیے پاکستان نہیں آ پا رہے۔

سوشل میڈیا پلیٹ فارم ایکس پر جاری بیان میں قاسم خان نے کہا کہ وہ اور ان کے بھائی کئی دنوں سے پاکستان آنے کی کوشش کر رہے ہیں تاکہ اپنے والد سے ملاقات کر سکیں، جو طویل عرصے سے قید تنہائی میں ہیں اور جن کی صحت سے متعلق تشویش بڑھتی جا رہی ہے۔

قاسم خان کا کہنا تھا کہ ان کے والد کو مناسب اور آزاد طبی سہولتیں فراہم نہیں کی جا رہیں، جو ایک قیدی کے ساتھ ظلم کے مترادف ہے۔ انہوں نے مزید کہا کہ بچوں کو اپنے والد سے ملنے سے روکنا اجتماعی سزا کے برابر ہے۔

انہوں نے عالمی برادری اور انسانی حقوق کی تنظیموں سے اپیل کی کہ وہ اس معاملے کا نوٹس لیں اور بروقت آواز اٹھائیں، اس سے پہلے کہ صورتحال ناقابلِ تلافی نقصان کی طرف چلی جائے۔

واضح رہے کہ قاسم خان اور ان کے بڑے بھائی سلیمان خان اپنی والدہ جمیما گولڈ اسمتھ کے ساتھ لندن میں مقیم ہیں۔

یہ بیان ایسے وقت میں سامنے آیا ہے جب حکومت نے حال ہی میں اس بات کی تصدیق کی تھی کہ عمران خان کو صحت کے مسائل کے باعث اسلام آباد کے پمز اسپتال میں طبی معائنہ اور علاج فراہم کیا گیا تھا۔