نیپا واقعے کا مقدمہ میئر اور دیگر کیخلاف درج کرانے کیلیے ایس ایچ او سے جواب طلب

شہر قائد کے علاقے گلشن اقبال نیپا چورنگی کے قریب کھلے مین ہول میں گر کر جاں بحق ہونے والے تین سالہ بچے کے کیس میں عدالت نے میئر اور دیگر کے خلاف مقدمہ درج کرنے پر ایس ایچ او گلشن اقبال سے جواب طلب کرلیا۔

تفصیلات کے مطابق ڈسٹرکٹ اینڈ سیشن کورٹ شرقی نے نیپا چورنگی کے قریب کھلے مین ہول میں گر کر تین سالہ ابراہیم کی ہلاکت کے معاملے پر میئر کراچی سمیت دیگر حکام کے خلاف مقدمہ درج کرانے کی درخواست پر ایس ایچ او گلشن اقبال سے جواب طلب کر لیا۔

ایڈووکیٹ شیخ ثاقب احمد کی جانب سے دائر درخواست پر عدالت میں سماعت ہوئی، جس میں مؤقف اختیار کیا گیا کہ ابراہیم کی موت براہِ راست متعلقہ بلدیاتی حکام کی غفلت کا نتیجہ ہے، لہٰذا میئر کراچی، ٹاؤن چیئرمین گلشن اقبال اور دیگر ذمہ داران کے خلاف قتلِ باالسبب کا مقدمہ قائم کیا جائے۔

درخواست گزار نے مؤقف دیا کہ متاثرہ بچے کے اہلخانہ نے بھی بلدیاتی اور ضلعی انتظامیہ کو نااہلی اور لاپروائی کا ذمہ دار ٹھہرایا ہے۔ کھلے مین ہول کی طویل عرصے سے مرمت نہ ہونا حکام کی ناکامی کو ظاہر کرتا ہے۔

درخواست گزار نے کہا کہ بروقت ریسکیو نہ آنے کی وجہ سے اہلخانہ کو نجی مشینری بلانے پر 15 ہزار روپے خرچ کرنا پڑے، جس سے یہ واضح ہے کہ شہری ایک غیر فعال اور کرپٹ نظام کا بوجھ برداشت کر رہے ہیں۔

عدالت نے فریقین کا موقف سننے کے بعد ایس ایچ او گلشن اقبال کو نوٹس جاری کرتے ہوئے واقعے سے متعلق تفصیلی جواب جمع کرانے کی ہدایت کر دی۔ کیس کی مزید سماعت 11 دسمبر کے لیے مقرر کی گئی ہے۔