مولانا فضل الرحمن کا صمود فلوٹیلا پر حملے کے خلاف آج ملک گیر احتجاج ہوگا

جمعیت علمائے اسلام کے سربراہ مولانا فضل الرحمان نے امریکی صدر کے پیش کردہ 20 نکاتی امن منصوبے کو یکسر مسترد کرتے ہوئے صمود فلوٹیلا پر ممکنہ یا حالیہ حملے کے خلاف ملک بھر میں جمعہ کو احتجاجی مظاہروں کا اعلان کر دیا ہے۔

جمیعت کی جانب سے جاری کردہ بیان کے مطابق مولانا فضل الرحمان نے کہا کہ وہ اس منصوبے کو قبول نہیں کرتے اور فلسطینیوں کے خلاف کسی بھی قسم کے ظالمانہ اقدام کو برداشت نہیں کیا جائے گا۔

انہوں نے تمام ضلعی ہیڈکوارٹرز میں جمعہ کے روز فلسطینی عوام کے ساتھ یکجہتی اور اسرائیلی کارروائیوں کے خلاف پرامن مظاہروں کی ہدایت کی ہے۔

بیان میں مزید کہا گیا کہ مظاہروں کا مرکزی مقصد صمود فلوٹیلا پر ہونے والے حملے کی شدید الفاظ میں مذمت اور بین الاقوامی برادری سے فلسطینی عوام کے حقوق کے تحفظ کے لیے فوری اقدامات کا مطالبہ ہوگا۔

جے یو آئی (ف) کے رہنما مولانا عبدالغفور حیدری نے علما کرام سے اپیل کی کہ جمعہ کے خطبات میں صدر ٹرمپ کے 20 نکات کے خلاف قراردادیں منظور کی جائیں اور عوام بڑی تعداد میں مظاہروں میں شرکت کے ذریعے اپنی دین اسلام اور انسانیت کے حق میں کھڑے ہونے کا ثبوت دیں۔

پارٹی کے عہدیداروں نے مظاہروں کی اپیل میں زور دیا کہ احتجاج پرامن اور قانون کے اندر رہ کر کیا جائے تاکہ پیغام مؤثر انداز میں عالمی سطح تک پہنچے۔