خطے کی موجودہ صورتحال، ایئرلائنز کیلیے نیا ہدایت نامہ جاری

ائیرپورٹس اتھارٹی کی جانب سے فضائی حدود کے حوالے سے نیا نوٹم جاری کر دیا گیا ہے، جس کے تحت مخصوص اوقات میں مختلف فضائی سیکٹرز عارضی طور پر بند رہیں گے۔

ذرائع کے مطابق خطے میں موجودہ صورتحال کو مدنظر رکھتے ہوئے پاک فضائیہ کو ہائی الرٹ رکھا گیا ہے، جبکہ لاہور اور کراچی فلائٹ انفارمیشن ریجن میں جنگی طیاروں کی مشقیں جاری ہیں۔

نوٹم میں بتایا گیا ہے کہ 14 اور 15 جنوری کو لاہور اور کراچی فلائٹ انفارمیشن ریجن کے بعض حصوں میں فضائی سرگرمیاں محدود رہیں گی۔ اس دوران کمرشل پروازوں کو خصوصی احتیاط برتنے کی ہدایت جاری کی گئی ہے۔

ائیرپورٹ حکام کے مطابق تمام کمرشل ائیر لائنز کے پائلٹس کو متبادل فضائی راستوں کے استعمال کی ہدایت دی گئی ہے تاکہ پروازوں کا شیڈول اور مسافروں کی سلامتی متاثر نہ ہو۔

حکام کا کہنا ہے کہ یہ اقدامات احتیاطی نوعیت کے ہیں اور فضائی سلامتی کو یقینی بنانے کے لیے کیے جا رہے ہیں۔