غزہ میں تعیناتی کے لیے پانچ ہزار فلسطینی پولیس اہلکاروں کی مصر میں ٹریننگ

قاہرہ: مصر کے وزیر خارجہ بدر عبد العاطی نے اعلان کیا ہے کہ مصر نے غزہ میں امن قائم کرنے کے لیے 5 ہزار فلسطینی پولیس اہلکاروں کی تربیت کا آغاز کر دیا ہے۔

عبد العاطی نے ایک مقامی ٹی وی چینل سے گفتگو میں بتایا کہ تربیت یافتہ اہلکاروں کی فہرستیں تیار ہیں اور انہیں مصر کے کیمپوں میں تربیت دی جا رہی ہے، اس میں اردن بھی تعاون کر رہا ہے تاکہ یہ اہلکار غزہ میں تعینات کیے جا سکیں، کیونکہ اس وقت وہاں ایک حفاظتی خلا موجود ہے۔

انہوں نے کہا کہ پولیس اہلکاروں کی تعیناتی اور غزہ کی تعمیر نو کا کام فلسطینی وزیراعظم کی نگرانی میں ہوگا، جو قاہرہ میں بین الاقوامی کانفرنس میں شرکت کریں گے، بشرطیکہ جنگ بندی پر اتفاق ہو جائے۔

عبد العاطی نے مزید کہا کہ فلسطینی اتھارٹی غزہ کے انتظام کے لیے ایک خصوصی کمیٹی قائم کرے گی تاکہ فلسطینی ریاست کے دونوں حصوں میں یکجہتی قائم رہے۔

انہوں نے بتایا کہ کانفرنس کے دوران متعدد ورکشاپس ہوں گی جن میں پولیس انتظامات، ترقی اور تعمیر نو شامل ہیں۔ فلسطینی اتھارٹی تمام امور سنبھالنے کی صلاحیت رکھتی ہے۔

عبد العاطی نے اسرائیلی پالیسی پر تنقید کرتے ہوئے کہا کہ اسرائیل کی موجودہ حکمت عملی طاقت کے زور پر غلبہ قائم کرنے اور غزہ میں اپنی فوجی کارروائی بڑھانے پر مرکوز ہے تاکہ مکمل کنٹرول حاصل کیا جا سکے۔

انہوں نے مزید کہا کہ مصر کو یقین ہے کہ یہ اقدامات اسرائیل کے لیے نہ سکیورٹی فراہم کریں گے اور نہ استحکام۔عبد العاطی نے زور دیا کہ اسرائیلی سکیورٹی صرف اس وقت ممکن ہے جب فلسطینی عوام کے جائز حقوق تسلیم کیے جائیں، جن میں ایک آزاد اور خودمختار ریاست کا قیام سرِ فہرست ہے۔

 طاقت کے استعمال سے امن نہیں آئے گا بلکہ خطے کی صورتحال مزید پیچیدہ ہوگی۔انہوں نے مصر کی کوششوں کا ذکر کرتے ہوئے کہا کہ حکومت ہر سطح پر کوشش کر رہی ہے تاکہ اسرائیل کی غزہ پر جارحیت کو روکا جا سکے۔

عبد العاطی نے کہا کہ مصر فلسطینی قیادت، خاص طور پر حماس، اور اسرائیل کے ساتھ رابطے میں ہے اور قطر و امریکہ کے تعاون سے امن کی کوششیں کر رہا ہے تاکہ جنگ بندی ممکن ہو اور فلسطینی عوام تک انسانی امداد پہنچ سکے۔